1. Gako nagusia: barazkiak hutsean ontziratuta egosi
   Parrillan jarri aurretik barazki gehienak egostea komeni da: porruak, zainzuriak, orburuak, ilarrak… Baina barazkiek ur asko hartzen dute egosterako garaian, eta hori ez da oso bateragarria parrillarekin. Hortaz, barazkiek urarekin kontakturik izan ez dezaten, hutsean ontziratzea gomendatu zigun Felixek, eta ondoren horrela egosi. 80-90 graduren bueltan orduerdi pasatxoz egin daiteke hori. Modu horretara, testura hobea lortzen da parrillan jartzerako garaian. Beste barazki batzuk zuzenean jar daitezke sutan: tomateak, alberjiniak, txanpiak….

2. Kontrasteak sortu
   Garrantzitsua da hori: plater bat osatzerako garaian, zapore eta testuren artean kontrasteak egitea ideia ona dela azpimarratu zuten Iriarteko sukaldariek. Parrillan egindako barazkiak gatzatzeko, adibidez, ketutako gatza erabili zuten. Gehienok ez genuen ezagutzen eta, aizue, izaera ona ematen dio! Barazkien kasuan, adibidez, gazi puntua bikain datorkie. Eta postrerako, gozoa ongi moldatzen da zitrikoekin. Azpian dituzue errezetak!

3. Parrillarako tresneria
   Egin nahi dugunaren araberakoa izango da erabili beharrekoa. Esate baterako, salteatzeko, zulotxo txiki batzuekin perforatutako zartagin zahar bat erabiltzen dute Iriarten. Txanpiak eta tomateak ere zartagin horretan egin zituzten, baina, kasu honetan, tapa batekin tapatuta. Zainzuri eta porruentzat, aldiz, bisigu parrilla batean sartu zituzten; eta alberjinia, parrilla bikoitz batean.

Barazkiak parrillan egiteko 6 ideia
Sei plater prestatu zizkiguten Felix Belaunzaran, Javi Hualde eta Borja Del Moral sukaldariek. Eta, noski, ondoren, bakoitzetik zatitxo bat dastatzeko aukera izan genuen. Aizue: mundialak!

Orburuak
Behin kanpoko hostoak kenduta egosi. Azken puntua, bi modutara egin daiteke: plantxan –beti ere zartagin itsasgaitz bat erabilita– edo parrillan. Biak ala biak, bikainak. Ketutako gatza erabili. Behin platereratuta, fin-fin moztutako kokospe iberikoaren xerra batzuk jarri gainean, eta orburuen beroarekin egingo dira.

Aprobetxamendu hoberako gomendio bat: kendutako hostoak, ogi txigortuan busti eta frijituz gero, chip goxo batzuk lor daitezke.

Porruak
5-10 minutuz jarri behar dira sutan –behin egosita, noski–, txingarraren bizitasunaren eta parrillaren altueraren arabera. Kolore pixka bat hartzen hasten direnean daude ateratzeko moduan. Laguntzeko, romesko saltsa bat –tomate, baratxuri eta hurrekin egiten da, batik bat–. 

Alberjinia
Txundituta utzi gintuen plater honek: sinplea bezain goxoa, benetan! Eta, nola egin? Bada, alberjinia xerratan ebaki ondoren, dadotan moztuko bagenu modura ebakiak egin, guztiz moztu gabe. Modu horretara suaren berotasuna hobeto sar dadin lortuko dugu. Gero, parrilla bikoitz batean egin behar da, 10-15 minutuz. Txanpinoiak eta tipulinak, berriz, zartagin batean jarri parrillan, eta tapatu. Eginda daudenean, platereratu eta gainetik, kontraste bikaina egingo dion saltsa hau gehitu: arrautzen gorringoak eta soia-saltsa nahastuta. 

Tomatea
Tamainaren arabera, laurdenetan edo zati txikiagotan moztu, eta zartaginean sartuta jarri parrillako sutan. 10 bat minutuz izan sutan, ura galdu eta txigortzen den arte. Eta kontrastea egiteko zein saltsa erabili? Ba albahakarekin egindakoa. Saltsa hori, albahaka hostoak, tipulin hostoak, martorria (zilantroa), izotzak eta oliba olioa nahastuta lortzen da. Benetan nahasketa ederra da. 

Barazki menestra
Hiru prozesu ditu plater honek. Alde batetik, brokolia, azalorea, azenarioa eta kardua, banan-banan egosi eta ondo iragazi. Gero, plantxan egin. Aurretik, ordea, kalabazin, urdaiazpiko eta baratxuri pixka bat erregosi, oinarri modura, eta behin barazkiak gehituta, olio tanta gutxi batzurekin salteatu. Ilarrak, parrillan egin eta gainerako barazkiak dauden zartaginera gehitu. Behin hori guztia platerean, tenperatura baxuan egindako arrautzak gehitu. Horretarako, 63ºC-tan berotu arrauzak, 38 minutuz. Jan aurretik, guztia nahastu.

Eta, postrerako, piña parrillan
Eta, hemen eztabaida: naturala, ala potekoa? Bada, Felixek argi esan zigun: naturalarekin, askoz hobe. Behin anana zurituta eta tiratan moztuta, plantxan egin. Ura eta azukrea galduko ditu horrela, eta karamelizatzea lortuko dugu. Begitara, torrada baten itxura hartuko dute. Behin hori eginda, parrillan azken ukitua eman, 5 bat minutuz jarrita. Txikitutako galleta, hurra toffea (hurrak eta gurina nahastuta lortzen den krema), zitrikoekin egindako saltsa (laranja, menta edo limoia esaterako) eta helatuarekin batera zerbitzatu daiteke. Osagai horietako bakoitzak ahoan kontraste bereziak sortuko ditu, bata bestearengandik oso ezberdinak.

Tira, badituzue orain ideia mordoxka bat parrilla aurrean jarri eta saltseatzeko. Eta, ez baduzu modurik… Felixek esan zigun bezala, beti izango dituzue zabalik Iriarte Jatetxeko ateak. Eskerrik asko, Felix, Javi eta Borja azalpen interesgarri hauengatik. Baita Batasuna Elkarteari ere, beren sukalderaino sartzen uzteagatik.