• Nondik -edo norengandik- datorkizu Tolosako Azokara hurbiltzeko ohitura?

Familian betidanik izan dugu azokarekiko lotura berezi bat. Nire amona Maria Luisa Segurola azokagilea zen eta beti kontatzen zizkigun azokaren inguruko istorioak, astoan  jeisten zenekoa, karretera egin zutenekoa,…

Horrez gain txiki txikitatik larunbatero aitarekin azokara joaten nintzen. Ama lanean izaten zen eta amatxorentzat lore sorta bat erosten genuen. Gogoan dut Zerkausia sarreran txitei begira zenbat ordu pasatzen nituen eta zenbat aldiz erregutzen nion aitari haietako bat etxerako hartzeko. Tamalez, ez nuen inoiz zuloz jositako kaxatxo horietako bat etxera eraman.

• Zer da Tolosako Azokatik gehien erakartzen zaituena?

Bertakoa bertan erosteko aukera da gehien erakartzen nauena. Azokagileak ereindako produktuak direla jakiteak. Horrez gain, nahiko saltseroa naizela esango nuke, eta azokagileekin berriketan aritzea ere oso gustoko dut. 

• Zer ez da inoiz falta zure erosketetarako Azoka Lagunen poltsan?

Berdura plazan kokatzen diren Iguategi Baserriko Esthertxori beti egiten diot bixita, barazkiak, babarrun txuria, arrautzak,… aste osorako produktuak erostea gustatzen zait bertan.

• Garaiko produktu bakarra aukeratu ahal izango bazenu, zein izango litzateke?

Abuztu amaierako tomatea da gehien miresten dudana, duen zaporearengatik. Ziurrenik udarako janka guztien ostean, etxeko goxoan garbi jateko gogoak ere izango du eragina.

• Zein da zure plana larunbat goizetan?

Esnatu eta txakurra paseatzearekin batera bueltaxka bat egiten dut azokatik 8:00ak aldean. Etxera bueltan gosaldu eta frigorifikoan zer dudan ikusi ondoren, erosketa egitera jeisten naiz. 11.00k aldean bukatzen dut eta ondoren hamaiketakorako pintxo eder bat.

• Aukeratu taberna eta pintxo bat, azoka bisitatu ondoren ezinbestekoa dena:

Orbela Tabernako kokotxa pintxoa. Eguzkia sartzen da eguerdi partean Tolosako Alde Zaharreko Arostegieta kalean, eta beti da momentu polita. Ez dut ezagutzen herririk Tolosa bezain besteko girorik duenik, larunbat goiz batean. Arrazoi batengatik ez bada, bestearengatik izango da, baina ziur txaranga edota musika entzungo dituzula kaletik. Ekitaldi-faktoria bat da gure herria. Laister itzuliko da bizia Tolosara!

• Emaiguzu zure gustoko produktu baten errezeta:

Orientar estilora, barazkiz eta haragiz beteriko kuiatxoak prestatzea gustoko dut. Kuiatxoaz gain beste barazki askorekin egin daiteke errezeta hau, piperrak, alberjinia,… ondorengo pausoak jarraitu behar dira errezeta egiteko:

• Barazki nagusia, kasu honetan kuiatxoa uretan egosi erditik zatituta, 5 minutuz. Ondoren hustu kuiatxoaren mamia goilara baten laguntzaz, eta erreserbatu.
• Tipula, azenarioa eta piparra gorriztatu zartarian, behin gorrituta gehitu haragi xigortua.
• Gehitu erreserbatu dugun kuiatxoaren mamia, gorriztatutako barazki eta haragiari. 15 minutuz su bajuan eduki, guztia bateratu arte.
• Gehitu gatza, curry goilarakada bat eta irin goilarakada bat. Nahastu ondo guztia.
• Gehitu 2 edalontzi olo-esne eta utzi murrizten. Bexamel moduko bat sortuko delarik.
• Bete kuiatxoak “bexamel” honekin eta sartu labean 180º, 15 minutuz.
• On egin!

• Zer esango zenioke inguruko jendeari Tolosako Azokara etor daitezen?

Azokan eros dezatela eta azoka babestu dezatela. Oso ohituta gaude azoka bertan izateaz eta batzutan dugun altxorra ez dugu apreziatzen. Azokak atzetik izugarrizko lana du, baratzetan, baserrietan, muntaian,… eta erosleak falta bagara, guzti honek ez du etorkizunik izango. Beraz euts diezaiogun azokari eta disfrutatu dezagun dugun altxorraz.