8 gomendio onddoak biltzera atera aurretik - Tolosako Azoka

8 gomendio onddoak biltzera atera aurretik

#Azoka lagunak
Udazkena perretxiko bila mendira ateratzeko garaia da, baina beti itxaron beharko dugu euria egin arte. Aurreko egunetan euria eta eguzkia izan ditugu, eta horrek gauza bakarra esan nahi du: basoak une ezin hobean daude zortea probatzeko!

Perretxikoak naturaren oparia dira, gutizia, gure sukaldeetan funtsezkoak: baina kontuz ibili behar da! Ez du balio edozein tokitara (eta edozein modutara) guztia biltzera ateratzea. Ezinbestekoak dira oinetako onak eta jantzi onak. Badakigu goizean goizeko freskoa zer den... Eta guk, makila bat eramatea gomendatzen dugu.

Beti norbaitekin ateratzea komeni da (norbaiti nora goazen esatea ere bai), onddoak aurkitzen ditugun leku zehatzak ezkutuan gordetzea gustatzen zaigun arren; eta ahal den guztietan, basora sartzen garenean bidearen erreferentziak hartzea komeni da (GPS bat eramatea ez da ideia txarra!). Garrantzitsua da, halaber, gorantz begiratzea; izan ere, onddo gehiago topatuko dituzu pagadi eta pinudien artean.

Hauek biltzera animatu aurretik, onddoa edo perretxikoa hezetasunaren eraginez hazten dela jakin behar da; materia organikoz elikatzen dira, eta lurrazalera ateratzen direnean esporak zabaltzen hasten dira. Espora hauek beste onddo bat sortzen hasiko dira baldintzak onak badira. Egin klik hemen onddoak nola hazten diren ikusteko (time-lapsea barne!).

Biltzaile onak arrastorik ez duela uzten esan ohi da: hemen gomendio batzuk basora irten aurretik!

  • Ez nahastu lurrean erorita dauden hostoak: hau egitean hezetasun-geruza aireztatu egiten da, mizelioa mugituz (lurrean sartuta dagoen onddoaren zatia), hau lehortuz eta hondatuz.
  • Moztu perretxikoak labana batez hauek lurretik osorik atera ordez: horrela, onddoaren mizelioa ez desagertzea lortuko dugu, onddo gehiago atera daitezen.
  • Erabili zumezko otarra, inoiz ez plastikozko poltsak: aireztatuago dagoenez, esporak zabaltzen joango gara; gainera, perretxikoak poltsetan usteldu egin daitezke!
  • Ez oso gazteak, ezta oso zaharrak ere: ez da komeni perretxiko txikiak hartzea, denbora igaro ahala hobetu egingo baitute; zaharrei dagokienez, espora-sortzaile nagusiak dira eta hobe hauek hor uztea ( oso helduta badaude indigestioak gerta daitezke).
  • Ez zaitez pasa: behar baino perretxiko gehiago bilduz gero, ez diegu erreproduzitzeko astirik emango. Neurrian bildu.
  • Ez hartu ezagutzen ez duzun perretxikorik, eta are gutxiago kontsumitu, ez bazaude %100ean seguru.
  • Ez eman ostikorik edota ez puskatu ezagutzen ez dituzun nahiz txarrak diren perretxikoei: ekosisteman funtzio bat betetzen dute eta utzi egin behar dituzu. 
  • Errespetatu lur pribatuak eta bidean topatzen dituzun langak: itxita aurkitu badituzu, itxi berriro. Abereentzat garrantzitsua da! Zonalde batzuetan sartzeko baimena lortu behar da (baita ordaindu ere). Beraz, informatu aurretiaz.

Onddoak eta perretxikoak interesatzen bazaizkizu, zorioneko zaude; izan ere, Aranzadiko Mikologia Saileko profesionalekin irteera bat antolatu dugu urriaren 23rako. Bertan perretxikoak eta onddoak bilatuko dituzue Tolosaldeko basoren batean, eta haietaz ikasiko duzue. Irteera Azoka Lagunentzako esklusiboa da (hemen harpidetu zaitezke), eta izena eman nahi duenak mezu elektroniko bat bidali beharko du lagunak@tolosakoazoka.eus helbidera. Plazak mugatuak dira.