Garaiko Tolosako Azokako produktuak abiapuntu hartuta, igerilekura nahiz hondartzara eraman ditzakegun 6 plater ezberdin kozinatzen erakutsi zigun.
Tomatea, lekak, kuiatxoak eta gereziak izan ziren sukaldeko protagonistak. Hauek, berriz, Soniak ekarritako 6 errezetak: sinpleak, azkarrak, eta edonork kozinatzeko modukoak.
TARTARRA:Tomate onen garaia iristen ari dela eta, errezeta honek zure gonbidatuak txundituta utziko ditu: zuritu tomatea eta kendu pepitak, eta moztu ezazu dadoetan. Ondoren xukatu egin behar da, ura botatzeari utzi arte. Tomatea “Perrins” saltsarekin, ziapearekin, alkaparrekin, albahakarekin, oregano lehorrarekin eta dadotan moztuako tipula morearekin nahastu behar da.
Platerean jartzerako garaian eraztun bat erabili daiteke, forma borobila emateko. Gainetik aguakate pixka bat jarri, eta zerbitzatu arte ez gatza bota, ur gehiago bota ez dezan.
Kozinatzen hasi aurretik, lekak garbitzeko ertzak kenduko dizkiogu. Denbora askoz egosi gabe, irakiten dagoen uretan eskaldatuko ditugu lekak. Honekin klorofila markatzea lortuko dugu, eta horrela, kolore berde indartsua geratuko zaie lekei. 2 minututan uretatik atera eta sartu uretara (ura izotzekin, egosketa mozteko).
Zartagi batean xerratutako baratxuria pixka bat salteatuko dugu, eta ondoren, lekak. Behin salteatuta, platerean jartzerako garaian gainetik urdaiazpiko gordin zati batzuk jarriko dizkiogu. Arrautzaren gorringo nahasia gehitu ahal zaio ondoren, pixka bat goxatzeko.
Errezeta honek 3 osagai besterik ez ditu: kuiatxo edo kalabazina, arrautza bat eta gazta. Hasteko kalabazina birrinduko dugu. Ondoren, arrautzarekin eta gazta birrinduarekin nahastuko dugu masa homogeneo bat eskuratu arte. Azkenik, plantxa bero batetik pasako ditugu, emaitza kurruskari bat lortzeko.
Aurreko errezetatik sobratutako kuiatxoa makiltxotan ebakita, irinetik, aurratzetik eta ogi birrindutik pasako dugu, eta labean egiten utzi 10 minutuz 180ºC-tara. Zerbitzatzerako garaian, oregano ali-oli bat gehitu bat gehitu ahal zaio, makiltxoak bertan bustitzeko.
Betiko salmorejoari ukitu berezi bat ematen erakutsi digu Soniak. Kasu honetan, gereziarekin egin dugu, baina egositako erremolatxarekin ere oso ona geratzen dela aitortu digu. Tomatea eta gereziak garbituko ditugu lehenik, pepitak eta hezurrak kentzeko. Dena batera birrinduko dugu, eta nahi izanez gero nahasketa hau iragazi egin daiteke azal zatiak kanpoan uzteko (ez dira txarrak). Ondoren, ogi-mamia nahasketa honetan minutu batzuez bustitzen utzi, eta birrindu egingo dugu baratxuri erdia, ozpina, gatza eta oliba olioa gehituta.
Gomendioa! Soniak dio, presarik gabe kozinatuz gero, hobea dela tomate-gerezi birrinduaren nahasketa ogi-mamiarekin batera gau oso batez hozkailuan uztea eta hurrengo egunean birrintzea, osagai guztiak hobeto bateratzea lortuko baita horrela.
Guztiok dakigu entsalada bati, letxugaz gain, ia nahi diogun guztia bota ahal diogula. Bada, entsalada honen gakoa ozpin-olioan dago: gereziak, oliba olioa, ozpina eta antxoak birrinduta lortu da. Kasu honetan letxugari gazta xerratua eta tipula morea gehitu zaizkio, baina nahi diren osagai fresko guztiak gehitu ahal zaizkio.
Gomendio bat! Entsalada bat igerilekura edo hondartzara eramateko, pote batean sartu osagaiak banan bana: behe-behean jarri ozpin-olioa, eta joan osagaiak gehitzen, “bustienetik” lehorrenera, goian letxuga utzita.
Prestatu erosketa zerrenda larunbat honetarako, eta prestatu plater fresko hauek datorren astean datorren eguraldi onaz igerileku, hondartza edo mendian gozatzeko! Eta gogoratu errezeten bideoak topatuko dituzula gure Instagramen: @tolosako.azoka
