Quiche errezeta… barazki soberakinekin! - Tolosako Azoka

Quiche errezeta… barazki soberakinekin!

#Azoka lagunak
Udako oporrak kale-kantoian daudela, urtero gure hozkailuetan galtzen diren janari-hondarrekin zer eginak kezkatzen gaitu gutako asko. Joan den egunean soberan geratu zitzaizkigun porru horiek, laster jaten ez badugu hondatu egingo den tomate hori, txartzen hasi den baina oraindik salba dezakegun kuiatxo hori.... Gaurko artikuluan Tolosako Azokako barazkiekin egin dezakezuen errezeta goxo eta interesgarri bat proposatuko dizuegu. Oporretara joan aurretik hozkailua husteko modu ona da!

Uda iristearekin batera, eta, beraz, udako fruta eta barazkien sasoiarekin, ohikoa da Tolosako Azokan egiten ditugun erosketetan barazki gehiegi erostea, eta ondoren horiek guztiak kontsumitzeko gai ez izatea. Oporretara joateko zortea baduzue ere, ziurrenik, hozkailua hustu nahiko duzue irten aurretik: ba ez bota ezer, eta aprobetxatu errezeta hau zure bidaira eramateko!

Tolosako Azoka Lagunak elkartean elikagaiak alferrik galtzearen aurka gaude, eta horregatik, bai gaurko artikuluan bai datozen asteetan iritsiko diren zenbait artikulutan ere elikagai horiek guztiak aprobetxatzeko hainbat aukera proposatuko dizkizuegu.

Gaurkoan, soberan dituzuen barazkiekin quiche bat prestatzea proposatuko dizuegu. Frantzian ohikoa den plater honek irtenbide ezin hobea proposatzen du haiekin zer egin ez dakigun elikagai guztiak aprobetxatzeko; barazkiak, haragia eta arraina onartzen baititu osagaien artean. Arrautzak, esnea eta esne-gaina edo irina bezalako hidratoak ere errezeta honen osagai nagusiak dira, eta, beraz, oso errezeta interesgarria da.

Oharra: guk hozkailuan genituen barazkiak erabili ditugu, baina EDOZER gehitu diezaiokezu!


Quiche-a prestatzeko honako osagaiak beharko ditugu:

Orea egiteko (egina erosi daiteke, baina etxean egitea gomendatzen dizuegu):

  • 200 gr gari-irin.
  • 80 gr gurin (oso hotza).
  • Arrautza 1.
  • 5gr. gatz.

Betegarria egiteko:

  • 2 arrautza.
  • 200 ml esnegain.
  • 100 ml esne
  • 100 gr gazta-birrindu
  • Gatza eta piperbeltza
  • Mota guztitako barazkiak. (Kuiatxoa, tipula, tomatea, brokolia, perretxikoak, ziazerbak, porruak, azenarioa… gehi diezaiokezue. Soberan dituzuen edo nahi dituzuen barazki guztiak). Guk 3 porru, tipula erdia, kuiatxo erdia eta ilarrak erabiliko ditugu.
  • Ganbak (aukerazkoa)

Elaborazioa:

Orea egiteko:

  1. Irina bahetu eta gurin hotza gehitu.
  2. Irina eta gurima nahastu apur-testura lortu arte.
  3. Arrautza eta gatza gehitu. Nahastu ore homogeneo bat geratu arte, baina gehiegi tematu gabe, orearen glutena ez garatzeko eta kurruskatsua eta hauskorra gera dadin.
  4. Film paperean bildu eta hozkailura sartu ordu erdiz.

Betegarria egiteko:

  1. Barazkiak sueztitu.
  2. Arrautzak, esnea, esnegaina, gazta, gatza eta piperbeltza nahastu.
  3. Barazkiak nahasketari gehitu.

Labera sartu aurretik:

  1. Labea berotu 180º-tara.
  2. Orea molde batean zabaldu eta sardeska batekin zulatu. (Labeko papera erabiltzea gomendatzen dizuegu, orea moldean itsatsi ez dadin )
  3. Orea labean sartu 10-15 minutuz. (Gainean pisua jarri orea hazi ez dadin).
  4. Orea labetik atera eta betegarria gehitu.
  5. Quiche-a 25-30 minutuz labean sartu, eta listo! Dastatzeko prest izango dugu!
  6. Gure gomendioa zuritutako ganbak quichea labetik atera baino 5 minutu lehenago gehitzea da, gehiegi egosi ez daitezen.

ON EGIN!