Tomatea: beroa, argia eta eguzkia. Landarean bertan heldu edota behin uzta jasota gorritzen utzita, bakoitzak bere gustuaren arabera. Dena delakoa ere, aholku txiki bat: behin erosita mantendu nahi baduzu, gorde buruzbehera; alegia, zurtoina edo hostoak beheruntz dituela.
Beroa, argia eta eguzkiaren saria ere Ibarrako piparrak. Hauek amaitzen direnean itxiko dute askok udako zikloa. Ikusi zenuen lehengo astean hauek urte osoan jan ahal izateko lana nola egiten den? Egin klik hemen kontserban nola gorde ikasteko.
Ez dira, inolaz ere, Tolosako Azokako postuetan topatuko dituzun barazki bakarrak: alberjinia, aza, azalorea, azenarioa, borraja, brokolia, erremolatxa, Gernikako piparrak, Padrongoak, kuiatxoak, kukuluak, ziazerbak, lekak, letxuga ezberdinak, patata, pikillo piperrak, pipermorroak, piper txorizeroak, porruak, tipula gorria edota zuria… Eta luze jarrai genezake zerrendarekin. Garai polita gure mahaien inguruan larunbateroko pasioa emateko!
Negura begirako ereintza eta landaketa lanekin ere bagabiltza gure baratza nahiz soroetan: arbia, ziazerba, tipulina, aza, bruselaza, eskarola, kukulua, zerba, erremolatxa.. Landare usaindunak eta sendabelarrak biltzeko momentua ere badugu.
Eta fruituak? Goza eta goza ari dira fruituak landaretan: sagarrak, udareak, basakaranak, mahatsak, pikuak, mugurdiak, gereziak, mizpirak… Bilakatuko dira patxaran, sagardo, konpota, marmelada, edota konfitura, guk hala nahi izanez gero.
Gorde ilustrazio hau, eta erabaki zein produktu sartuko dituzun larunbat honetarako erosketa-zerrendan!
