Josu Ozaitak Ibarrako Piparrari buruz idatzi duen liburuan irakurri dugunez, kooperatibaren lehen urtean 5.000 poto egin zituzten; garai onenetan 150.000 egitera iritsi dira elkarlanean.

Kontserbak egiteko eskulana nahitaezkoa da: altuerari eta formari erreparatu, eta potoetan sartzeko egokiak diren piparrak banan-banan aukeratzen baitira. Gero, txukun-txukun ozpinetan sartzen dira, ongi iraun dezaten.

Aukeratzen ez direnak, noski, orduan jateko aprobetxatzen dira, nahieran: frijituta, fresko, saltsaren bat eginez…

Nola egin Ibarrako Piparren kontserbak etxean?

Azokan pipar freskoak erosi eta kontserbak etxean egitea ere erraza da. Animatu urrats hauek jarraituz negurako piparrak gordetzera!

Osagaiak:

• Pipar freskoak
• ¼ ozpin
• ¼ ura
• Gatza
• Poteak

Jarraibideak:

1. Ur eta ozpin kantitate berdina jarri pote batean, gatza gehituta. Mugitu ezazu dena ondo disolbatu dadin.
2. Gehitu piparrak banan bana, aurrez garbituta.
3. Tarterik geratuko balitz, egin nahasketa berriro, ur eta ozpin kantitate berdinak erabiliz.
4. Kontserbatu 3 hilabetez.. eta kontsumitzeko prest!