Hain udakoak diren bi zopa hauek hegoaldeko lurraldeetan dute euren jatorria, baina gero eta ezagunagoak dira gure inguruan; izan ere, oso errezeta erraz eta osasungarriak dira, eta Tolosako Azokan lor ditzakegun produktuekin egin ditzakegu: produktu freskoekin, errezeta freskoak! Eta gainera, tomatea dute protagonista.
Baliteke “gazpatxo” hitza entzuten duzunean Andaluzia eta hegoaldeko beste lurralde batzuetako giroa burura etortzea. Berdin “salmorejoa”rekin, hau ere ezagutzen baduzu: Kordobako gastronomiaren erregea.
Baina badakizu nola prestatzen diren? Eta are garrantzitsuago: hain antzekoak badira ere, euren arteko ezberdintasunak bakizu zein diren? Irakurri gaurko artikulua eta esaiguzu ondoren zein den zure gustokoena!
Bi zopa hotz hauen protagonista tomatea da (gurea den zaporetsuarekin, ederra aterako zaigu!); eta euren arteko alde nagusia berriz testura da: gazpatxoa zopa batekin parekatzen da, eta salmorejoak, osagaien artean ogi gehiago duenez , pure edo krema baten antza handiagoa du. Gazpatxoa eta salmorejoa oso modu antzekoan prestatzen dira, eta jarraian laburbilduko dizkizuegu:
Gazpatxoa
Osagaiak (6 pertsonentzat):
Kilo 1 tomate
Pepino 1
Pipar berde 1
2 baratxuri-ale
5g gatz
30 ml ozpin
50 ml oliba-olio
50 g ogi gogor
250 ml ur
Jarraitu beharreko urratsak:
Moztu tomateak, pepinoa eta piperra zati txikietan. Zuritu baratxuria eta gehitu barazkiei.
Jarri barazkiak edukiontzi batean eta gehitu olioa, ura, ogia, ozpina eta gatza.
Txikitu gutxi gorabehera 5 minutuz, edo krema arina eta pikorrik gabea geratu arte (testura izan dadila zure gustukoa!).
Pasa gazpatxoa iragazki batetik (pasapurea edota koladore antzeko bat) eta utzi hozkailuan ordu erdi inguruz. Listo! Gure gazpatxo freskoa jateko prest izango dugu!
Salmorejoa
Osagaiak (6 pertsonentzat):
Kilo 1 tomate
Baratxuri-ale 1
5g gatz
150 ml oliba-olio
250 g ogi gogor
Jarraitu beharreko urratsak:
Moztu tomateak eta birrindu. Gehitu baratxuria eta jarraitu birrintzen.
Iragazi tomate-zukua haziak eta pulpa kanpoan geratu daitezen. Guk koladore batekin egin dugu.
Txikitu ogia eta sartu tomate zukua dagoen ontzian, eta utzi minutu batzuk ogiak tomatea xurgatu dezan. Ondoren, birrindu. Kolore gorria pixka bat leuntzen hasi zaigula ikusiko dugu.
Olioa eta gatza gehitu, eta birrindu. Orain, gure gustoko testura duen krema bat lortzen saiatuko gara, olio gehiago edo gutxiago gehituz (beraz ez bota dena lehenengo momentutik). Jabetuko zarenez, salmorejoaren kolore bereizgarria den kolore naranja hori lortzen hasiko gara.
Amaitzeko, gainetik urdaiazpikoa edo/eta arrautza egosia gehitzea gomendatzen dizuegu, ikusgarritasunaz gain, salmorejoari nutrienteak eta zaporea gehituko baitizkiote.
Biak ala biak hotzean jaten diren kremak dira. Hozkailuan gordez gero, udako egun beroenetan eskuragarri izatea eskertuko duzu!
