Nola egin kremaz betetako 'Euskal pastela'? - Tolosako Azoka

Nola egin kremaz betetako ‘Euskal pastela’?

#Azoka lagunak
Etxeko bixkotxa, Gâteau Basque, Euskal Pastiza… Adiera asko ditu 2022ko Goxua azoka berezian protagonista izango den Euskal Pastelak.

Eta barrubetea ere nahi den modukoa izango da: kremazkoa, txokolatezkoa... Goxuarako euskal pastelaren lehiaketarako prestatzen has zaitezen, errezeta eta bitxikeriak dakartzagu gaur: BIDEO ETA GUZTI!

Hasi baino lehen: nola bereiztu Euskal Pastelak?

Begi hutsez zaila dirudien arren, trikimailu erraz bat dago euskal pastel bat zati bat moztu aurretik barrubetea zein den jakiteko. Baina, hori bai, tradizioari leial zaizkienen kasuan bakarrik balioko du.

Ohituraren arabera, Lauburu batek markaturiko pastelak gerezi beltzeko marmeladaz beteta daudenak dira, eta goiko aldean marrez osatutako patroia erabiltzen da pastel-krema dutenentzat.

Guk, kasu honetan, EGUZKIA Elkartearen kremaz betetako Euskal Pastelaren errezeta jarraituko dugu.

Errezeta tradizionala, Eguzki elkartearen eskutik:

Osagaiak
(6 pertsonarentzat)

Orea egiteko:
300 g. irin
3 gatz pittin
120 g. gurin
200 g. azukre
2 arrautza
2 koilarakada ron edo banilla
Legami lehorreko pakete bat		Krema egiteko:
1⁄2 L esne
4 arrautza
125 g. azukre hauts
40 g. irin
2 koilarakada ron
1-2 banilla baina

Ikusi bideoa:

Pausoz pauso:

1. Orea prestatzea

  • Gurina zatitan moztu eta nahastu azukrearekin.
  • Ondoren, gehitu arrautzak, gatza, irina, legamia eta rona edo banilla.
  • Nahastu dena itsasten ez den masa homogeneo bat lortu arte.
  • Utzi hozkailuan ordubetez

2. Krema prestatzea

  • Irabiatu arrautzak eta glass azukrea, nahasketa apartsu bat lortu arte.
  • Ondoren, pixkanaka irina gehitu eta nahastu.
  • Esnea irakitera eraman, banilla-zorroak eta ron pixka batekin.
  • Banilla zorroak kendu ondoren, bota esnearen erdia arrautza eta azukre nahasketa duen ontzira. Dena nahastu eta lapikora itzuli.
  • Eraman nahasketa irakite puntura, 3-4 minutuz, etengabe nahasiz, krema loditu dadin.
  • Utzi hozten giro-tenperaturan. Film gardenarekin estali dezakezu, gainean geruza bat ez sortzeko.

3. Tarta muntatzea

  • Aurrez berotu labea 160°C-tan. Busti gurinarekin 22 cm-ko diametroa duen molde bat, gero irineztatu.
  • Luzatu orea arrabol batekin irineztatutako mahai baten gainean, 4-5 mm-ko lodiera izan arte.
  • Jarri masa-zirkulu bat moldearen hondoan. Bete moldea kremarekin hoztu ondoren.
  • Zabaldu gainerako orea tapa gisa, ertzak ondo ixtea ziurtatuz, krema atera ez dadin.
  • Busti tartaren goiko aldea arrautza-gorringoarekin eta markatu sardexka batekin.
  • Laberatu su motelean (160ºC) 35-40 minutuz.

4. Kontserbatzeko

  • Hiru egunez gorde daiteke hozkailuan, ontziaren barruan.
  • Izoztu ere egin daiteke, betiere ontziratzean izozte data markatuta.
  • Euskal pastela desizozteko, jarri hozkailuan 24 orduz.
  • Krokantea berreskuratzeko, jarri labe aireztatu batean 5-10 minutuz 160° C-tan.

Eman izena GOXUAko postre lehiaketan:

Datorren larunbatean (urriaren 29an) Tolosako GOXUA azoka bereziaren baitan postre lehiaketa antolatuko da, eta bi modalitate egongo dira: sagar tarta eta euskal pastela. Behin errezeta edukita, animatuko zara lehiaketan parte hartzera? EMAN IZENA LEHIAKETAN HEMEN KLIK EGINDA!